როცა ვფიქრობთ, როგორ გავხადოთ სამყარო უფრო უკეთესი, პირველ რიგში ისეთი რევოლუციური ცვლილებები გვახსენდება, რომელთა მიღწევა მხოლოდ ერთეულებს შეუძლიათ. ეს შეიძლება იყოს აღმოჩენები მეცნიერებაში, ისეთი წამლის გამოგონება, რომელიც უკურნებელ სენს არჩენს ან, თუნდაც, კოსმოსში ხომალდის გაშვება. თუმცა, ხშირად გვავიწყდება, რომ უკეთესობისკენ ცვლილებები ჩვენი მიკროსამყაროებიდან იწყება და ამისათვის დიდი გამოგონებები საჭირო არაა.
მრავალი პროფესიიდან არქიტექტურა ერთ-ერთია, რომლის საშუალებითაც ადამიანებს შეუძლიათ გარემო უფრო უკეთესი გახადონ და ის სივრცე, სადაც ვცხოვრობთ, ისე მოაწყონ, რომ არც ადამიანი დაზარალდეს და არც ბუნება.
ამ სტატიაში მოგიყვებით, რატომ უნდა აირჩიოთ არქიტექტურა მომავალ პროფესიად.
1. გამოავლენ შენს კრეატიულობას
არქიტექტურის, როგორც პროფესიის ერთ-ერთი ყველაზე საინტერესო მხარე ისაა, რომ საშუალებას აძლევს ადამიანს, შეინარჩუნოს, განავითაროს და დანერგოს ინდივიდუალური მიდგომა, გამორჩეული, ავთენტური სტილი თავის საქმიანობაში. ცხადია, შენობის დაგეგმარება უკვე თავის თავში მოითხოვს კრეატიულობას, მაგრამ იმისთვის, რომ ამ ინდუსტრიაში გამორჩეული ადგილი გეჭიროს და შექმნა რაღაც ორიგინალური, აუცილებელია, მაქსიმალურად გამოავლინო შენი შთაგონება.
ეს პროფესია დაგეხმარებათ, მუდმივად შეინარჩუნოთ ენთუზიაზმი, იზრუნოთ საკუთარი უნარების გაუმჯობესებაზე და ნებისმიერ ასაკში აკეთოთ საინტერესო, სასარგებლო, თქვენთვის საყვარელი საქმე.
2. მიიღებ ცოდნას სხვადასხვა მიმართულებით
არქიტექტურაზე ხშირად მხოლოდ ინტერიერის ან შენობის დიზაინის დაგეგმარება გვახსენდება, თუმცა სინამდვილეში ის უამრავი დისციპლინის ნაზავია. ხელოვნება, მათემატიკა, ფიზიკა, ისტორია, პოლიტიკა, გეოლოგია — ეს ის მცირე ჩამონათვალია, რომლის ცოდნა კარგ არქიტექტორად ჩამოგაყალიბებს.
გარდა ამისა, არქიტექტურაზე სწავლა გულისხმობს, გუნდის მართვის, ლოჯისტიკის, მექანიკის, ქალაქების დაგეგმარების, ეკოლოგიის, ახალი ტექნოლოგიებისა თუ ლანდშაფტების შესწავლასაც. პროფესიონალ არქიტექტორს კი კონტექსტის კარგი აღქმისა და პრაქტიკული საქმიანობის ისტორიულ თუ ხელოვნების ჭრილში მორგების უნარიც აქვს. ასე რომ, როცა არქიტექტურის სწავლას დაასრულებთ, თქვენ სამყაროში მიმდინარე პროცესებზე კარგი ცოდნა გექნებათ.
3. შეძლებ, გქონდეს მაღალანაზღაურებადი სამსახური
არქიტექტურა დღეს ერთ-ერთი მაღალანაზღაურებად საქმიანობად ითვლება. მაგალითად, აშშ-ს შრომითი სტატისტიკის ფედერალური ბიუროს ცნობით, ამერიკაში არქიტექტორების საშუალო წლიური შემოსავალი 80 000 აშშ დოლარამდეა. ცხადია, სხვადასხვა ქვეყნის მონაცემი ამ კუთხით განსხვავდება, თუმცა, ეს სპეციალობა ყოველთვის და ყველა საზოგადოებაში საჭიროა, ხოლო ის ინდუსტრია, სადაც არქიტექტორები ყველაზე მეტად მოთხოვნადები არიან, მუდმივად მზარდია.
საერთაშორისო გამოცდილების მიღება, მოგზაურობა, განსხვავებული კულტურების აღმოჩენა, თანამედროვე ხედვების ქონა ამ პროფესიის ერთ-ერთი მნიშვნელოვანი ნაწილია. ხოლო კარიერის სხვადასხვა ქვეყანაში გაგრძელების საშუალებას მისი უნივერსალურობაც ადვილად იძლევა.
4. ცხადად დაინახავ შენი შრომის შედეგს
არქიტექტორის საქმიანობის შედეგი ერთ-ერთი ყველაზე ხელშესახები რამაა. როცა შენ მიერ შექმნილ მრავალსართულიან შენობას შეხედავ, აუცილებლად მიხვდები, რომ სწავლა და მუდმივი სწრაფვა განვითარებისთვის ფასეულია. ეს საქმე იმდენად პრესტიჟული და დაფასებულია, რომ ზოგიერთ ქვეყანაში შენობებზე არქიტექტორები ხელმოწერასაც ტოვებენ, როგორც მხატვრები — ხელოვნების ნიმუშებზე.
არქიტექტურის, როგორც პროფესიის ხიბლი იმაშიცაა, რომ შრომის შედეგი მალევე უკვალოდ კი არ ქრება, არამედ ათეული წლები მაინც ინარჩუნებს თავის მნიშვნელობას და არქიტექტორის გარდაცვალების შემდეგაც მის სახსოვრად იარსებებს. ეს არის ერთ-ერთი გზა, დარჩე “უკვდავი”, რადგან შენობები, რომელთაც ააგებ, შენზე ბევრ რამეს “იტყვის”.
5. შეცვლი სხვების ცხოვრებას უკეთესობისკენ
არქიტექტორების საქმიანობა საზოგადოების ყოველდღიურ ცხოვრებაზე ყველაზე ცხადად აისახება ხოლმე. ისინი ქმნიან დასასვენებელ ადგილებს, საცხოვრებელ კომპლექსებს, სკოლებს — ყველა იმ სივრცეს, სადაც ადამიანები ცხოვრობენ, ერთობიან და სწავლობენ.
საბუნებისმეტყველო მეცნიერებების ცოდნით, გარემოსდაცვითი საკითხების გათვალისწინებით, მწვანე პოლიტიკის გატარებით, ესთეტიკური ხედვით და პრაქტიკულობით არქიტექტორებს შეუძლიათ, ადამიანების ყოველდღიურობა კომფორტული და ჰარმონიული გახადონ.
ასე რომ, თუკი ეს საკითხები გაინტერესებთ, არქიტექტურის სწავლაზე აუცილებლად უნდა იფიქროთ. კარგ არქიტექტორად ჩამოსაყალიბებლად კი აკადემიური ხარისხის მიღება ერთ-ერთი საუკეთესო გზაა.
#drpkhakadze #gochadze #sheniinterieri
წყარო:https://on.ge
მასალის გამოყენების პირობები
