ბინის შეძენა დიდი პრობლემებთან, დროსთან და ფინანსურ სახსრებთან არის დაკავშირებული. ბინა არის ადგილი, რომელიც დიდ გავლენას ახდენს ჩვენი ყოველდღიური ცხოვრების მრავალ ასპექტზე. ამიტომ მისი შეძენა სერიოზული ნაბიჯია, რომელსაც ბევრი ფიქრი და გააზრება სჭირდება, რათა მიღებული გადაწყვეტილება არ ინანოთ. ამ სტატიის მეშვეობით გაეცნობით უძრავი ქონების შერჩევის პროცესის მთავარ ასპექტებს და გაერკვევით, რომელი ბინის შეძენა სჯობს – ძველ აშენებულ პროექტში თუ მიმდინარე მშენებლობაში.
მზარდი მოთხოვნა-მზარდი ფასი
უძრავი ქონების ფასი უმეტესად ზრდადია, რაც მას საუკეთესო კაპიტალად აქცევს. ბინის შერჩევისას მყიდველი ბევრ ფაქტორს ითვალისწინებს, მათ შორის გადამწყვეტია ფასი. უძრავი ქონების ღირებულება რეგულირდება ფართის, პრესტიჟული და კომფორტული მდებარეობის, ხარისხის და სხვა ფაქტორების მიხედვით. საინვესტიციო უძრავი ქონების შეძენის საუკეთესო პერიოდად მშენებლობის საწყისი ფაზა ითვლება, რადგან ამ დროს ფასი შედარებით დაბალია. პროექტის ეტაპების ცვლილებასთან ერთად კი ფასიც იზრდება.
ფასების ზრდის დინამიკა:
– 20%-ის გაყიდვა/აშენებისას ფასი იმატებს 7%-ით;
– 50%-ის გაყიდვა/აშენებისას ფასი იმატებს 10%-ით;
– 80%-ის გაყიდვა/აშენებისას ფასი იმატებს 15%-ით.
ცნობადობა და საჯაროობა
მშენებარე პროექტში ბინის შეძენა მნიშვნელოვანია, რომ კომპანიის ისტორია და გამოცდილება კარგად შეისწავლოთ. დეველოპერული კომპანია, რომელიც საკუთარ სამუშაოს ხარისხში დარწმუნებულია, ცდილობს იყოს თვალსაჩინო და სრულად გამჭვირვალე. დაინტერესებულ ადამიანს შეუძლია მარტივად მოიძიოს ინფორმაცია კომპანიის შესახებ, რაც უფრო მეტი პუბლიკაცია და ინფორმაცია მოიპოვება, მით უფრო სანდოა სამშენებლო კომპანია.
საერთო სტანდარტიზაცია
საცხოვრებელი კორპუსების მშენებლობებისთვის კანონმდებლობით დამტკიცებული სტანდარტის თანახმად, სამშენებლო კომპანიებს რიგი ვალდებულებები აქვთ, რაც დაცული უნდა იქნეს პროექტის მშენებლობის ნებართვის მიღების დროს. პროექტის შედგენისას ხორციელდება ადგილის საფუძვლიანი შესწავლა, ტარდება გეოლოგიური და გეოდეზიური კვლევები. ქალაქის საპროექტო სამსახური ადგენს სიმაღლის კოეფიციენტს, რომლის მიხედვითაც განისაზღვრება, კონკრეტულ ტერიტორიაზე მაქსიმუმ რამდენ სართულიანი შენობის აშენებაა რეკომენდირებული.
ექსპლუატაცია
შენობა-ნაგებობები ექსპლუატაციის ხანგრძლივობის მიხედვით 3 კატეგორიად იყოფა:
- I კატეგორია – ეს არის დროებით შენობა-ნაგებობები და მათი მაქსიმალური, საგარანტიო ექსპლუატაციის ვადა 20 წელია;
- II კატეგორია – არის 5 სართულამდე შენობები. მათი ექსპლუატაციის ვადა 20-40 წელია;
- III კატეგორია – მოიცავს ცხრასართულიან და უფრო მაღალ კორპუსებს და მათი საგარანტიო ექსპლუატაციის ვადა 100 ან ზოგ შემთხვევაში უფრო მეტი წელია.
ახალი შენობების ექსპლუატაციის ვადა 100 წელზე მეტია. აღნიშნული ფაქტორი ძირითადად დამოკიდებულია მშენებლობის პროცესში გამოყენებულ სამშენებლო-სარემონტო მასალების ხარისხზე, რაც სხვა მნიშვნელოვან დეტალთან ერთად, იმ სტანდარტით არის განსაზღვრული, რომლის დაცვაც სავალდებულოა მშენებლობის ნებართვის მისაღებად.
დოკუმენტაცია
მიმდინარე პროექტში ბინის შეძენისა თქვენ ძირითადი კომუნიკაცია გაქვთ კომპანიასთან და არა ფიზიკურ პირთან. შესაბამისად ყველა შესაძლებლობა გაქვთ სრულად გაეცნოთ კომპანიას, მათ ისტორიას, პროექტის დოკუმენტაციას და ნასყიდობის ხელშეკრულებას. ყურადღება მიაქციეთ შემდეგ პუნქტებს:
- საპროექტო დოკუმენტაცია;
- მშენებლობის ნებართვა;
- საჯარო რეესტრის ჩანაწერი მიწის ნაკვეთის შესახებ;
- წინარე და ერთიანი ნასყიდობის ხელშეკრულებები.
მშენებლობის პროცესის კონტროლი
თქვენ საშუალება გაქვთ, თვალი ადევნოთ მშენებლობის პროცესს მიწის სამუშაოების დაწყებიდან მის სრულად ჩაბარებამდე, ასევე შეგიძლიათ, მოითხოვოთ ყველა საჭირო ინფორმაცია სამშენებლო-სარემონტო მასალებთან დაკავშირებით, რაც დაგეხმარებათ, დარწმუნდეთ კომპანიისა და მშენებლობის სანდოობაში.
დასკვნა:
ბინის შეძენა სერიოზული და საპასუხისმგებლო გადაწყვეტილებაა. უნდა გაითვალისწინოთ ყველა შესაძლო ვარიანტი, დეტალურად შეისწავლოთ თითოეული პროექტი და საბოლოოდ შეარჩიოთ ის, რომელიც თქვენი მოთხოვნებისთვის და შესაძლებლობებისთვის იდეალურია.
