საკუთარი სახლი, აგარაკი, ერთგვარი შესაძლებლობაა ადამიანისთვის, განიხილოს ნებისმიერი იდეა ლანდშაფტის დიზაინის შესაქმნელად. ამ სფეროში სტილის არჩევანი შეუზღუდავია. ეზოს გამწვანების პროცესში ბევრი დეტალი უნდა გაითვალისწინოთ, რომელთაგან თითოეული განსაზღვრავს საბოლოო შედეგს.
– საიდან უნდა დაიწყოთ?
– როგორ მიაღწიოთ სასურველ შედეგს?
წაიკითხეთ სასარგებლო რჩევები ლელა კაჭარავასგან, რომელმაც მებაღეობის ჰობი ახალ პროფესიად აქცია
რა უნდა გავითვალისწინოთ ლანდშაფტის დიზაინის დავგეგმვამდე?
– პირველ რიგში, სანამ ბაღის გამწვანებას გადაწყვეტთ და დაიწყებთ, უნდა განსაზღვროთ როგორი ტიპის ბაღი გჭირდებათ. იქნება ეს სეზონური, სადაც მხოლოდ დასასვენებლად გაატარებთ დროს, თუ მუდმივი საცხოვრებელი. ამის მიხედვით უნდა დაიყოს ბაღი სხვადასხვა ზონებად: მოსასვენებელი, საბავშვო ზონა, საცეცხლური, სპორტული მოედანი, დეკორატიული კუთხე, წყლის სარკე და სხვ.
მნიშვნელოვანია მკაფიოდ გადაწყვიტოთ, რა გსურთ. ხეხილისთვის და ბოსტნისთვის ცალკე უნდა გამოყოთ ზონები. ასევე, გასათვალისწინებელია საპარკინგე ადგილი, საფეხმავლო და ფუნქციური ბილიკები, რომელთა საშუალებითაც სხვადასხვა ზონა ერთმანეთს დაუკავშირდება.
ამის შემდეგ, უკვე უნდა გაითვალისწინოთ ბაღის/ეზოს ადგილმდებარეობა, თუ საიდან ამოდის მზე, დასავლეთი მხარეა თუ აღმოსავლეთი. ამ პარამეტრების გათვალისწინებით უნდა მოხდეს მცენარეების შერჩევა.
მაგალითად, დასავლეთის ზოგიერთ მცენარეს ძალიან უჭირს აღმოსავლეთის მშრალ ჰავასთან და ნიადაგთან შეგუება. ასეთი მცენარეებია: ჰორტენზია, კამელია, გარდენია. ასევე, უნდა გაითვალისწინოთ მაღალმთიან რეგიონში გსურთ ბაღის მოწყობა თუ ბარში, რომ იმ ჰავის მიმართ გამძლე მცენარეები შეარჩიოთ.
როგორ შეიძლება გავამწვანოთ ეზო შეზღუდული ბიუჯეტით?
– შეზღუდული ბიუჯეტით ეზოს გამწვანება ცოტა გაგიჭირდებათ, მაგრამ თუ მრავალწლიან და მარადმწვანე მცენარეებს ჩარგავთ, ყოველწლიური ხარჯი აღარ გექნებათ. ყოველწლიურ ხარჯში ვგულისხმობ: შეწამლვას, გასხვლას, კვებას ..
შეგიძლიათ დარგოთ ბზა, ტუიები, მრავალწლიანი მოყვავილე ბუჩქები, მრავალწლიანი ყვავილბი, ბოლქვოვანები.
რა უნდა მოვასწროთ გაზაფხულზე?
– პირველ რიგში, გაზაფხულზე უნდა ჩატარდეს ეზოს სანიტარული დასუფთავება.ბაღიდან ყველა დაავადებული ფოთოლი უნდა გავიტანოთ. უნდა გავსხლათ ხეხილი, ვარდები, ვაზი, დეკორატიული ბუჩქები.
მცენარეებს გარშემო უნდა გაუფხვიეროთ ნიადაგი. ასევე, უნდა ჩატარდეს გაზაფხულის წამლობა და კვება.
როგორ დავრგოთ და მოვუაროთ მცენარეებს
– მცენარის დარგვისას უნდა გაითვალისწინოთ ის პირობები, რომელიც იმ კონკრეტულ ჯიშს უყვარს. ზოგი მცენარე მზის მოყვარულია, ზოგიც პირიქით, ჩრდილის.
მზის მოყვარულ მცენარეებს მიეკუთვნება: ვარდი, მარადმწვანე ტუები, პიონები.
ჩრდილი უყვარს: ბზას, ფიტოსპორუმს, ჰოსტებს, ჰორტენზიებს.
ჩარგვის დროს უნდა ამოთხაროთ საკმაოდ ღრმა და განიერი ორმო, ჩაყაროთ დრენაჟი. ჩარგვა აუცილებლად ნოყიერ ნიადაგში უნდა მოხდეს.
თუ მაღალ მცენარეს რგავთ, უნდა გაუკეთოთ საყრდენი, მინიმუმ სამი წელი მაინც. როცა მცენარე ფესვს კარგად გაიდგამს შეგიძლიათ საყრდენი მოხსნათ.
რა გავრცელებულ შეცდომებს უშვებენ ყველაზე ხშირად ბაღის გამწვანებისას?
– ყველაზე გავრცელებული შეცდომები, ძირითადად არასწორად შერჩეული მცენარეებია.
მაღალმთიან რეგიონში აუცილებლად უნდა დარგოთ ყინვაგამძლე მცენარეები. ჩრდილის მოყვარული მცენარეები კი აუცილებლად ჩრდილში უნდა დაირგოს.
მასალის გამოყენების პირობები
