ავტორი: თინა თავხელიძე
sheniinterieri.ge – გთავაზობთ არქიტექტორ და ინტერიერის დიზაინერ მარიამ მაღლაკელიძესთან ექსკლუზიურ ინტერვიუს…
რა პრობლემებს აწყდებიან ხშირად ადამიანები, რემონტის დასრულებისას, როდესაც ინტერიერის დიზაინერი არ ჰყავთ? – იმისათვის, რომ სახლის სარემონტო პროცესი სასიამოვნო და ხანმოკლე იყოს, თანაც შედეგმა უსიამოვნო სიურპირზებით არ დაგვწყვიტოს გული, ინტერიერის დიზაინერის ყოლა გადამწყვეტია...
მის უნარს, მოახდინოს ტექნიკური დეტალებისა და შემოქმედებითობის სინთეზი, შეუძლია თქვენი საცხოვრებელი სივრცე მოარგოს თქვენსავე ცხოვრების წესსა და გემოვნებას.
ინტერიერის დიზაინერი არ არის მხოლოდ იმისთვის – რა ფერის კედლები გვქონდეს და როგორი სავარძელი დავდგათ – არამედ იგი თქვენი სურვილების, ტექნიკური დეტალებისა და შემოქმედებითობის შერწყმის შედეგად მიგაღებინებთ კომფორტულ, ტექნიკურად და ვიზუალურად გამართულ სივრცეს, რომელშიც წინასწარ არის გათვალისწინებული კედლების, ავეჯის, ელექტროობის, კონდიცირების და თითოეული სივრცის საჭიროებები.
არქიტექტორი და ინტერიერის დიზაინერი მარიამ მაღლაკელიძე, sheniinterieri.ge-ს მკითხველს სწორედ ამ ტიპის შეცდომებზე ესაუბრება:
“გამარჯობა, მე ვარ მარიამ მაღლაკელიძე – არქიტექტორი და ინტერიერის დიზაინერი. მინდა, გაგიზიაროთ სახლის სარემონტო პროცესის დამოუკიდებლად წარმართვისას ხშირად დაშვებული შეცდომები – ინტერიერის დიზაინი არის სფერო, რომელიც მოიაზრებს მთელი რიგი ტექნიკური, ტექნოლოგიური და შემოქმედებითი დეტალების შერწყმას ფუნქციურ დანიშნულებასა და მოთხოვნებთან.
საცხოვრებლის რემონტის დაწყებამდე აუცილებელია, წინასწარ განსაზღვრული იყოს თითოეული დეტალი, რაშიც გარდა ოთახების და ავეჯის განლაგებისა, წინასწარ წარმოდგენილი უნდა იყოს თითოეული სივრცის ფუნქციური დანიშნულება თუ განსახორციელებელი აქტივობა.
მხოლოდ ამის შემდეგ შეიძლება დაგეგმარდეს, შემუშავდეს კონცეფცია და განხორციელდეს სარემონტო სამუშაოები სწორად, ყოველგვარი ექსესების გარეშე.
ინტერიერის დიზაინერი, ფაქტობრივად, ვირტუალურად წინასწარ ცხოვრობს თქვენს ბინაში და წარმოიდგენს სხვადასხვა სცენარის განვითარებას, რათა თქვენი ბინა მოარგოს თქვენს გემოვნებასა და საჭიროებებს.
დიზაინერის ჩართულობის გარეშე ჩატარებული სარემონტო პროცესი სხვადასხვა გაუთვალისწინებელი გარემოების გამო, დროში და ფინანსებში იწელება. შედეგად რეალობა და მოლოდინი შეუსაბამობაში მოდის ერთმანეთთან.
ხშირად გაუთვალისწინებელი მომენტები უშუალოდ ცხოვრების პროცესში ან ბინის ავეჯით მოწყობის დროს იჩენს ხოლმე თავს. შესაძლოა, გაგიკვირდეთ, მაგრამ ყველაზე ხშირია შემთხვევები, როდესაც ოთახის გაბარიტები საშუალებას არ აძლევთ, რომ ავეჯი განათავსონ.
მაგალითად: საძინებლის სიგანე იმდენად მცირეა, რომ საწოლის დადგმის შემთხვევაში გასავლელი მანძილი არ რჩება, ან კიდევ უარესი – საწოლის დადგმა საერთოდ ვერ ხერხდება. ასევე ძალიან ხშირია გაუმართავი ელექტროობა, როზეტების არასაკმარისი რაოდენობა ან მათი არასაჭირო ადგილზე განთავსება. შედეგად, ყველასთვის ნაცნობი “დამაგრძელებელი” აუცილებელი ხდება და საცხოვრებელი სივრცე იტვირთება ზედმეტი სადენებითა და ჩამრთველებით, რაც ვიზუალურად არასასიამოვნოა და არეულობის განწყობას ქმნის.
ინტერიერის დიზაინერი ზუსტად ამ და სხვა მრავალ ტექნიკურ, ტექნოლოგიურ თუ შემოქმედებით დეტალს ითვალისწინებს. შედეგად, მოლოდინი და რეალობა ერთმანეთისგან აღარ განსხვავდება და არც ზედმეტი სადენები გირევენ განწყობას…”
გაეცანით მარიამ მაღლაკელიძის Instagtam გვერდს…
#drpkhakadze #gochadze #sheniinterieri
