12 უმნიშვნელოვანესი რეკომენდაცია სახლში სიმყუდროვის შესაქმნელად
სიმყუდროვე სახლში არის სიმშვიდისა და კომფორტის გარანტია, რაც თითოეული ჩვენგანისთვის აუცილებელია. ჩვენი რჩევები თქვენს სახლში თბილი ატმოსფეროს შექმნაში დაგეხმარებათ.
სწორი განათება
მყუდრო სახლის საფუძველი სწორი განათებაა. თითოეული ოთახისთვის ღირს ინტერიერის განათების სხვადასხვა სცენარების გათვალისწინება – სადღესასწაულო, რომანტიკული, ყოველდღიური და ა. შ. კარგია, როდესაც განათების მოწყობილობები სიკაშკაშის მაკონტროლებელი ფუნქციით არის აღჭურვილი. გაითვალისწინეთ ორი მარტივი წესი: ბრა და ტორშერი ყოველთვის უფრო კომფორტულია, ვიდრე ჭაღი, ხოლო სასადილო ოთახში განათება ზუსტად მაგიდის ზემოთ უნდა იყოს მოთავსებული.
შინაური ცხოველები
ცნობილი ამერიკელი დიზაინერის, ჯონათან ადლერის რჩევის თანახმად, შინაური ცხოველი უნდა შეიძინოთ – რეალური თუ არა, დეკორატიული მაინც. დერეფანში კატის ან ძაღლის სკულპტურის მოთავსება ხელს შეუწყობს ბინაში სიმყუდროვის შექმნას და ყოველდღე გაგახარებთ, ხოლო თეთრეული ან დეკორატიული ბალიშები კატის გამოსახულებებით საძინებელში ყველაზე თბილ და გულწრფელ ატმოსფეროს შექმნის.
ოთახის მცენარეები
ოთახის მცენარეები ინტერიერის გამოცოცხლებას და სიმყუდროვის შექმნას შეუწყობს ხელს. მცენარეების ალტერნატივა შეიძლება იყოს ქსოვილები და შპალერი ყვავილების ორნამენტებით ან ბოტანიკური დეკორით.
მკვეთრი ფერის ბალიშები
რაც მეტი ნათელი, ფერადი და სხვადასხვა სახის ბალიშს მოათავსებთ დივანზე, მით უკეთესი. მყუდრო ინტერიერი რბილი ბალიშების გროვის გარეშე წარმოუდგენელია. ქსოვილების ყიდვისას არ დაგავიწყდეთ მათი გამოცდა შეხებით.
ტექსტილის პანელები
მყუდრო საძინებლის მნიშვნელოვანი ელემენტია კედლები, გაფორმებული ქსოვილის პანელებით. ისინი მართლაც მდიდრულად გამოიყურება და დამატებით ხმის იზოლაციას უზრუნველყოფს.
სახლის არომატები
სახლი თქვენი საყვარელი სურნელით აავსეთ. შეგიძლიათ გამოიყენოთ არომატული სანთლები, რათა საკუთარ თავში რომანტიკული ან ბავშვობის სასიამოვნო მოგონებები აღძრათ.
სარკეები
გამოიყენეთ სარკეები. ისინი ოთახის ზომას ვიზუალურად გაზრდის და ინტერიერის სინათლით ავსებაში დაგეხმარებათ.
ცეცხლი
„გახსოვდეთ, სანთლები, ისევე, როგორც სასანთლეები, ზედმეტი არასოდეს არის“ –თქვა ცნობილმა დეკორატორმა – ანა მურავინამ. თუ სახლში ბუხარი არ გაქვთ, მისი იმიტაცია შექმენით.
სეზონური ტექსტილი
შექმენით დეკორატიული ბალიშებისა და ფარდების კომპლექტი ზამთრისა და ზაფხულის სეზონებისთვის. ზამთარში შეგიძლიათ შალი და ხავერდი გამოიყენოთ, ხოლო ზაფხულში – ბამბა, აბრეშუმი ან ტილო.
გენიალობა დეტალებშია
სახლში კომფორტის შექმნისას გახსოვდეთ წვრილმანები. ჩვევად აქციეთ თხევადი საპნის ლამაზ დისპენსერებში ჩასხმა. სამზარეულოში დაკიდეთ დაფა, რათა საყვარელ ადამიანებს შეტყობინებები და სამოტივაციო სიტყვები დაუტოვოთ. თუ საოჯახო ფოტოების გამოსაჩენ ადგილას მოთავსება გსურთ, ლამაზი ჩარჩოები შეიძინეთ.
რეგულარულად მოიშორეთ უსარგებლო ნივთები
გათავისუფლდით არაესთეტიკური და გამოუსადეგარი ნივთებისგან. თუ ეს საყვარელი ადამიანების საჩუქრებია და ვერ გადააგდებთ, დამალეთ ისინი.
სისუფთავე და წესრიგი
და ბოლოს, სახლს იდეალურად მოქმედი სანტექნიკა და სრულყოფილი სისუფთავე უნდა ჰქონდეს. ამის გარეშე კომფორტი წარმოუდგენელია.
QR კოდი
სტატიის ციტირება
შენი ინტერიერი. (2022). როგორ შევქმნათ სახლში სიმყუდროვე. 15 მარტი, 2022. https://sheniinterieri.ge/rogor-shevqmnat-sakhlshi-simyudrove/
