თაბაშირის ნაკეთობები თუ თქვენი ინტერესის სფეროა, მაშინ ეს სტატია თქვენთვისაა ✨️
sheniinterieri.ge გთავაზობთ ინტერვიუს ანა თედოშვილთან, რომელიც თავის მეუღლე ზურაბ კაჭარავასთან ერთად ქმნის თაბაშირის ულამაზეს ნაკეთობებს:
– მოგესალმებით, გვიამბეთ თქვენ შესახებ, როდის გაგიჩნდათ იდეა – ეს ულამაზესი ნამუშევრები შეგექმნათ?
– იდეა გაგვიჩნდა 10 თვის წინ. ერთ-ერთი დეკორაცია ვნახეთ უცხოურ ვებგვერდზე და გადავწყვიტეთ, გვეცადა და ჩვენც შეგვექმნა მსგავსი დახვეწილი დეკორაციები.
– რა დაბრკოლებები შეგხვდათ, როდესაც ამ საქმის კეთება აირჩიეთ?
– ყველაზე დიდი დაბრკოლება იყო, შეგვექმნა ხარისხიანი მინარევი, ბევრი საჭირო მასალა, რომელიც საჭიროა ჩვენი საქმიანობისთვის, არ იყიდებოდა საქართველოში. დღესაც ბევრი საჭირო მასალა უცხოეთიდან ჩამოგვაქვს.
– რა შეცვალა თქვენს ცხოვრებაში ახალმა გამოწვევამ?
– ეს საქმიანობა წამოვიწყეთ მე და ჩემმა მეუღლემ. ჩვენი მიზანი იყო, შეგვექმნა ყველასთვის ხელმისაწვდომი პროდუქტი. ამ საქმიანობამ შეცვალა ჩვენი ყოველდღიური რუტინა და მოგვიტანა მომხმარებლების დიდი სიყვარული, რომელიც ჩვენი უმთავრესი მოტივაციაა ამ საქმის გაგრძელებისთვის.
–ცხადია, მსგავს წამოწყებებს ფინანსური შესაძლებლობებიც სჭირდება… რამდენად რთული იყო თავდაპირველად ამ ბიზნესის წამოწყება?
– ამ საქმიანობას დიდი ბიუჯეტი არ სჭირდება, მთავარია მოთმინება, შრომისუნარიანობა და მომხმარებელს მიაწოდო ის პროდუქტი, რისი მოლოდინიც აქვთ. თავდაპირველი ბიუჯეტი 100 ლარი გვქონდა, ამ თანხით 4 კგ თაბაშირი და რამდენიმე ყალიბი ვიყიდეთ. ასე დაიწყო “თაბაშირას” ისტორია.
–პროდუქტი, რომელსაც თქვენი ნამუშევრების დასამზადებლად იყენებთ, რამდენად უსაფრთხოა ადამიანის ჯანმრთელობისათვის?
– პროდუქტს რაც შეეხება – სრულიად უსაფრთხოა ჯანმრთელობისთვის, თვითონ თაბაშირი არის ერთ-ერთი ყველაზე ჰიპოალერგიული და არატოქსიკური პროდუქტი.
–რა გეგმები გაქვთ მომავალში?
– წლის ბოლოს ვაპირებთ გაფართოებას, რაც მოიაზრებს 500–ზე მეტი ყალიბის დამატებას და მაღაზიის გახსნას. დღესდღეობით გვაქვს 250–ზე მეტი ყალიბი.
–დაბოლოს, რას ურჩევდით ადამიანებს, რომელთაც თქვენსავით სურთ მსგავსი საქმიანობის დაწყება, რა უნდა გაითვალისწინონ, სანამ ამ დიდ ნაბიჯს გადადგამენ?
– ჩვენი რჩევა იმ ადამიანებისთვის, ვისაც მსგავსი წამოწყება სურთ, იქნება, რომ აუცილებლად გააკეთონ ის, რაც უყვართ. რადგან სიყვარულის გარეშე ვერ შექმნით განსაკუთრებულ, ხარისხიან და ლამაზ ნამუშევრებს. ჩვენი საიდუმლოც ეს არის – ყოველ ნაკეთობაში დიდ სიყვარულს ვდებთ.
ავტორი: ლიზი გრიგოლავა
