ავტორი:ლიზი გრიგოლავა
sheniinterieri.ge გაგაცნობთ ელენე ბექაურს, რომელიც საკუთარი ხელებით ქმნის დეკორატიულ სარკეებს დიდი სიყვარულითა და სიამოვნებით❤️
-პირველ რიგში, მოგვიყევით თქვენ შესახებ, როდის და რატომ დაიწყეთ ეს საქმიანობა?
–გამარჯობა, სარკეების დამზადება 2022 წელსდავიწყე. მომწონდა ხელნაკეთი ნივთები დაგადავწყვიტე, სახლისთვის თავად დამემზადებინა ისეთი დეკორაცია, რომელსაც პრაქტიკული დანიშნულებაც ექნებოდა. ტექნიკური საკითხების მოგვარებაში მეუღლე დამეხმარა, როგორიცაა ხის მასალის შერჩევა და სასურველი ფორმის გამოჭრა, შევარჩიეთ დიზაინი და გამზადებული ხე მოვხატე. შემდეგ გავაკეთე მეგობრებისთვის და, რადგან სიამოვნებას მანიჭებდა ეს საქმე, გადავწყვიტე, სოციალურ ქსელებში განმეთავსებინა ნამუშევრები, რამაც ძალიან დიდი ინტერესი გამოიწვია ხალხის მხრიდან.
–მნიშვნელოვანია ისიც, რომ თითოეულ დეტალს საკუთარი ხელით ქმნით და ხატავთ, რა როლი უჭირავს ამ საქმიანობას თქვენს ცხოვრებაში?
–ვინაიდან თავად ვამზადებთ მასალებს და შემდეგ ხელით იხატება ყველა დეტალი, საკმაოდ შრომატევადია საქმიანობა და დიდ დროსა დაენერგიას მოითხოვს. როდესაც ჩვენი ხელნაკეთი ნივთებისთვის შევქმენით სოციალური ქსელები და დავიწყეთ შეკვეთების მიღება, ნამდვილად ვერ წარმოგვედგინა, სარკეების დამზადება ჩემს ძირითად საქმიანობად თუ იქცეოდა. განსაკუთრებით სადღესასწაულო პერიოდში იზრდება მოთხოვნა და ხშირად ღამისთევაც გვიწევს.
–როგორც ვხედავ, ულამაზესი ნამუშევრები გაქვთ, რა არის ის, რაც მყიდველებს თქვენს ნამუშევრებში მოსწონთ და თქვენზე აკეთებენ არჩევანს?
–ხელნაკეთ ნივთებზე მოთხოვნა თანდათან იზრდება, რაც ზრდის გაყიდვებსაც. არ გვაქვს სტანდარტული დიზაინები, ყველა ნახატის შეცვლა შეგვიძლია მომხმარებლის სურვილით. ვხატავთ ცნობილი მხატვრების ნამუშევრებს, ვუკეთებთ სხვადასხვა წარწერას. შეგვიძლია დავამზადოთ ფოტოსურათის მიხედვით, რაც მეტად ემოციურს ხდის საჩუქარს. ამასთანავე, გვაქვს არჩევანი ზომებში, პატარა სარკეების ფასი შედარებით დაბალია და მომხმარებლისთვის უფრო ხელმისაწვდომი.
–რა მასალას იყენებთ დაფების მოსახატად დარამდენად უსაფრთხოა იგი ადამიანებისთვის?
–ხის მასალაზე ვხატავთ აკრილის საღებავებით, რომელიც წყალგამძლეა და გაწმენდის დროს არ ზიანდება, შემდეგ ვამუშავებთ შესაბამისი საშუალებებით, რათა დროთა განმავლობაში არ გახუნდეს და შეინარჩუნოს სილამაზე.
–რა შეცვალა ამ საქმიანობამ თქვენს ცხოვრებაში, რა რჩევას მისცემდი მათ, ვისაც სრულიად ახალ ნაბიჯს დგამენ და სურთ მსგავსი საქმიანობის წამოწყება?
–პირველ რიგში, აუცილებელია წამოწყებული საქმიანობა განიჭებდეს სიამოვნებას. მე ვიპოვე საქმე, რომლის კეთებაც მაბედნიერებს და თან მაძლევს შემოსავალს, ყველას ვუსურვებ ამას და ვურჩევ, არ შეჩერდნენ, იმუშაონ პატიოსნად და აუცილებლად მიაღწევენ შედეგს, რაც მთავარია, იყვნენ დამოუკიდებლები და არ მიითვისონ სხვისი იდეა.
