დღევანდელ სამყაროში, როდესაც უფრო და უფრო მეტ დროს ვატარებთ შინ თუ სამსახურში, მნიშვნელოვნად იზრდება ჩვენი საცხოვრებელი თუ სამუშაო სივრცის როლი. მიუხედავად ამისა, ესთეტიკურობასა და ფუნქციურობაზე ფიქრში, ხშირად ვივიწყებთ ერგონომიკის როლს ინტერიერის დიზაინში.
და მაინც, რა არის ერგონომიკა?
ესაა სამეცნიერო დისციპლინა, რომელიც მიზნად ისახავს ადამიანისთვის უსაფრთხო, კომფორტული და პროდუქტიული გარემო-პირობების შექმნას მისი ანატომიისა და ფიზიოლოგიური პროცესების გათვალისწინებით.
რატომ არის ერგონომიკა მნიშვნელოვანი ინტერიერის დიზაინში?
ინტერიერში ერგონომიკა გულისხმობს ისეთი სივრცის შექმნას, რომელიც ხელს უწყობს სხეულის სწორ პოზას, ამცირებს ფიზიკურ დატვირთვას და სტრესს. დაბალი ხარისხის ერგონომიკამ შესაძლოა, გამოიწვიოს ჯანმრთელობის სერიოზული პრობლემები, როგორიცაა თავისა და კისრის ტკივილები, ხერხემლის პრობლემები და თვალის გადაღლილობა. მაღალი ხარისხის ერგონომიკა კი ახდენს ზემოაღნიშნული საკითხების პრევენციას და ხელს უწყობს ადამიანის საყოველთაო კეთილდღეობას.
ვნახოთ, როგორ შეიძლება შეიქმნას ერგონომიული ინტერიერი:
- აარჩიეთ კომფორტული და ერგონომიული ავეჯი. ეს განსაკუთრებით რბილ ავეჯს ეხება. დივნისა და სკამების შეძენისას, უპირველესად, ყურადღება მიაქციეთ რამდენად უწყობს ის ხელს ძვალკუნთოვანი სხეულის ნაწილების სწორ მდებარეობას. ჯდომისას შენარჩუნებული უნდა იქნას წელის სწორი პოზიცია. ზურგი კარგად უნდა ეყრდნობოდეს საზურგეს, რათა შემცირდეს დაძაბულობა ზურგისა და კისრის არეში. ფეხები მყარად უნდა იდგეს იატაკზე, შესაბამისად, სკამის სიმაღლეც ყურადსაღებია.
- შეარჩიეთ სწორი განათება. სივრცის დაგეგმარებისას ხელოვნურ განათებასთან ერთად მიზანშეწონილია ბუნებრივი განათების მაქსიმალური იმპლემენტაციაც, რაც ოპტიმალურ, კარგად განათებულ ინტერიერს იძლევა. ეს კი მნიშვნელოვნად მოქმედებს ჩვენს ხასიათზე, პროდუქტიულობასა და კეთილგანწყობაზე. მოერიდეთ კაშკაშა, ცივ განათებებს, რომელმაც შეიძლება თვალისა და თავის ტკივილიც კი გამოიწვიოს. აირჩიეთ თვალისთვის სასიამოვნო და უსაფრთხო თბილი განათება, რომელიც იდეალურია სარელაქსაციო განწყობის შესაქმნელადაც.
- ყურადღება მიაქციეთ აკუსტიკურ პრობლემებს. ხმაური ერთ-ერთი ყველაზე დიდი პრობლემაა, რასაც შიდა სივრცეებში ვაწყდებით. ის მიზეზია ყურადღების გაფანტვისა და ფიზიკური დისკომფორტის. სივრცის დაგეგმარებისას გაითვალისწინეთ როგორ გავრცელდება ხმა ინტერიერში და დარწმუნდით, რომ მიღებულია ზომები მის შესამცირებლად. ამისთვის შესაძლოა დაგჭირდეთ, ხმის დამხშობი სამშენებლო მასალები.
- გაითვალისწინეთ ოთახის ტემპერატურა და ვინტილაცია. ხელსაყრელი საცხოვრებელი პირობების შესაქმნელად, დარწმუნდით, რომ ოთახი არის კარგად განიავებული და ტემპერატურა არის ოპტიმალური. ჰაერის დაბალი ხარისხი საზიანოა ადამიანის ჯანმრთელობისთვის. ხშირად გამოხსენით ფანჯარა და მოერიდეთ დახურულ სივრცეში ქიმიური ხსნარების გამოყენებას.
Sheniinterieri-სთვის სტატია მოამზადა ფლორენციის დიზაინის აკადემიის კურსდამთავრებულმა, ინტერიერის დიზაინერმა, თაკო არდოტელმა.
❤️ თუ ინტერიერი შენი ინტერესის სფეროა, გაეცანი ჩვენი გვერდის სხვა სტატიებს💫
